Home 2016 November 07 EBIGAMBO BYA BISHOP RT. REV. NATHAN KYAMANYWA NA MAMA PEACE AKKIKI

EBIGAMBO BYA BISHOP RT. REV. NATHAN KYAMANYWA NA MAMA PEACE AKKIKI

EBIGAMBO BYA BISHOP RT. REV. NATHAN KYAMANYWA NA MAMA PEACE AKKIKI

Ruhanga ayatwesere omu buhereza omu Kanisa, gukaba mwaka 1975, obu nubwo nyaikiriziibwe kugenda Bishop Balya kutendekwa Obutebezi bw’Enjiri ebbaruha ya kasatu. Kyonka ebi bitakabaireho haroho Ruhanga omulimo ogwakaba atandikire omu bwomeezi bwaitu nyowe na mugenzi wange Akiiki. Nyowe nkaikiriza Yesu karaho omu mwaka gwa 1972 omu December 12th kandi Akiiki uwe akaba aikiriize Yesu 1970; omu buto bwaitu nuho twaikiririize; ha myaka 12 habwa Akiiki kandi ha 16 habwange. Kityonu omu mwaka gwa 1974, August 24 twatunga amaka. Okujunwa n’okutunga amaka ha myaka y’obuto kandi nubwo twayetwa kuhereza byona bihonderaine gukaba musingi ogw’amaani nambere obuhereza bwaitu busigikiire. Nitusiima Ruhanga ayatujunire, yatuha amaka kandi yatweta kumuhereza omu buhereza bw’Ekanisa. Obwakaiso bwaitu omu bufunze buli ngu: Yesu ajuna, Yesu ayeta; Yesu atuma kandi Yesu akora!! Akatujuna, yatweeta, yatutuma kandi yakora.

Ninkozesa (tu) habwokuba Ruhanga kunyeta akaraba omu mugenzi wange Akiiki hamu na Omukaikuru wange Maama Jane Kabwongera; nteetwe ndi muhuuru, nkeetwa tuli hamu; nahabwekyo tinsobora kubaza ha buhereza bwange ndi nyenka; kuruga ha kutandika kuhikya ha kumalirra tubaire hamu. Ekyabaireho tutali hamu nukwo kujunwa; Ebisigaireho byona tuli hamu.

Omu buhereza bwaitu bwona bututwaliire emyaka 41 kandi hali egi 14 niyo ebaire y’Oburolerezi. Tukatandika n’obutebezi bw’Enjiri, hanyuma twasoma kandi twajwekwa obwahule; hanyuma twajwekwa obwa Canon tutyo kuhikya habwa Bishop. Omu ebi byona nitubundaazibwa habwokuba kuruga omu kutandika tukeetwa omu buhereza bw’Obutebezi bw’enjiri ebbaruha ya kasatu, tutamanye ngu tulihinguraho aho. Eby’okukuzibwa n’amadaara egyo ekaba nyongeza. Nyowe nkaba ntamanyire ngu ndiba Mwahule. Uwe Ruhanga akaba aina entekaniza eze. Ekitinisa n’okunyumizibwa bibe bye.

Tukahereza omu buliisa bwa Ikoba ha Kanisa  January 1976 – December 1980. Kitamba Parish January 1984 – June 1985, Education Secretary (Diocesan Office) August 1988 – December 1992; Planning Officer 1993 – 1996; Principal Nile Vocational, Hoima Centre 1996 – 2001. Bishop w’Oburolerezi August 4th, 2002 – December 4th, 2016.

Hagati omu buhereza tukaba n’okusoma ha madaara ogakwahukana, Bishop Tucker, Mukono (present day UCU); Makerere University, Kampala; Daystar University; Nairobi.

Nitusiima Ruhanga anyakuturabize omu ebi byona kandi natusoboza kumuhereza. Habairemu bingi ebikubaire nibisobora kutulemesa obuhereza; habairemu okugumirirwa kwingi, kulengwa kwingi, ensozi hamu n’obusirimuko; emitego ya Setani nayo ebairemu baitu omu ebi byoona “tuli basinguzi.” Tukutendereza; Uwe Ruhanga naturwanirra.

Hagati omu buhereza Ruhanga atuheriiremu abaana aboojo n’abaisiki (4:2). Boona banu tukabatunga tuli omu buhereza twabasomesa, batunga amaka kandi batunga emirimo tuli omu buhereza, hati boona bakuzire baina amaka gaabu n’emirimo yaabu. Abaana banu nitubasiima muno habwokuba nabo baikaire naitwe omu buhereza bunu, bagumiire ebizibu by’obuhereza kandi bakwataniza hamu naitwe, nitubasiima habwokuba baana b’Abahereza mali, batatulemese. Mukama abahe omugisa.

Omu buhereza bwaitu ebitusingwize nibyo binu:

  • Okuganja hali Ruhanga (God’s favour)
  • Okuganja hali abantu (Good will)
  • Kukorra hamu n’abahereza bagenzi baitu (team work)
  • Obwekambi (hardwork)
  • Kwekambira kwega n’okugonza kumanya ebihyaka
  • Kulinda n’okukozesa kurungi obwire
  • Kwegera ha nsobi zaitu

Omu ebi byoona tihabuziremu ensobi; zibaire nyingi!! Mutuganyire – byona ebitabasemiize gutusingire, gutusingire, gutusingiire kimu; mutuganyire. Byona ebyabaire birungi, Mukama asiimwe, tali niitwe baitu Ruhanga ayatwesere nuwe akozere.

Nitusiima omulingo gw’embaganiza enkoragana ebaireho hagati yange n’Abahule inywena mutukozere kurungi – Aba Isabadikoni inywena mwebale. Inywena abatwakozere hamu muli Diocesan Secretary, Dean, Archdeacons, ba Canons n’aba Canon abatali baahule hamu n’abahi b’amagezi hali Omurolerezi – inywena hamu n’abakazi banyu. Abakyara b’Abahule tinsobora obutabasiima – mutuberiire barungi muno.

Nitusiima abantu ba Ruhanga inywena abakwataniize hamu naitwe omu buhereza waitu. Omwanya omu katabu kanu tigukumara kubasorongya inywena mukahwayo habwokuba muli baingi – abatukonyire kutwegesa obuhereza, abatuhabwire tuli omu nsobi, abatusagikire omu miringo nyingi, abatuhaire obukonyezi bw’ebyokulya, sente, endubata; abatusabiire, abatukulize n’ebindi biingi, inywena MWEBALE.

Author: Johnfisher

Leave a Reply

Your email address will not be published. Required fields are marked *